ಕೂಡ್ಲಿಗಿ: ವಿಜಯನಗರ ಜಿಲ್ಲೆಯ ಕೂಡ್ಲಿಗಿ ಪಟ್ಟಣದಲ್ಲಿ ದೀಪಾವಳಿ ಹಬ್ಬದ ಸಂಭ್ರಮದ ನಡುವೆ 'ರಾಯಲ್ ಎಂಟರ್‌ಪ್ರೈಸಸ್' ಹಾಗೂ 'ಈರೋ ಗಮ್ ಕಂಪನಿ' ಸಹಯೋಗದಲ್ಲಿ ಪಟ್ಟಣ ಹಾಗೂ ಕ್ಷೇತ್ರದ ವಿವಿಧ ಗಣ್ಯರು ಹಾಗೂ ಶ್ರಮಿಕ ಕಾರ್ಮಿಕರಿಗೆ ಗೌರವ ಸನ್ಮಾನ ಕಾರ್ಯಕ್ರಮ ಯಶಸ್ವಿಯಾಗಿ ಜರುಗಿತು.
ಖಾದರ್ ಭಾಷಾ ಅವರ ನೇತೃತ್ವದಲ್ಲಿ ನಡೆದ ಈ ವಿಶೇಷ ಕಾರ್ಯಕ್ರಮದಲ್ಲಿ ಸಮಾಜದ ವಿವಿಧ ಕ್ಷೇತ್ರಗಳಲ್ಲಿ ಸೇವೆ ಸಲ್ಲಿಸುತ್ತಿರುವ ಗಣ್ಯರನ್ನು ಹಾಗೂ ಹಗಲಿರುಳು ಶ್ರಮಿಸುವ ಕಾರ್ಮಿಕರನ್ನು ಗುರುತಿಸಿ ಸತ್ಕರಿಸಲಾಯಿತು. ಹಬ್ಬದ ಆಚರಣೆಯು ಕಾರ್ಮಿಕರ ಜೊತೆಗೂಡಿ ಅರ್ಥಪೂರ್ಣವಾಗಿ ಮೂಡಿಬಂದಿತು.
ಕಾರ್ಯಕ್ರಮದ ಪ್ರಮುಖ ಗಣ್ಯರ ಉಪಸ್ಥಿತಿ:
ವೇದಿಕೆಯಲ್ಲಿ ಕಾರ್ಮಿಕ ಮುಖಂಡರಾದ ಗುನ್ನಳ್ಳಿ ರಾಘವೇಂದ್ರ, ಹಿರಿಯ ವಕೀಲರಾದ ಎಲ್.ಎಸ್. ಬಶೀರ್ ಅಹಮದ್, ರಾಯಲ್ ಎಂಟರ್‌ಪ್ರೈಸಸ್‌ನ ಖಾದರ್ ಭಾಷಾ, ಈರೋ ಗಮ್ ಕಂಪನಿಯ ಪ್ರತಿನಿಧಿ ಮುಜಾಯಿಲ್, ಪತ್ರಕರ್ತ ಹಾಗೂ ಕಾರ್ಮಿಕ ಪ್ರಮುಖರಾದ ಬಡಿಗೇರ ನಾಗರಾಜ್, ಹಿರಿಯ ಕಾರ್ಮಿಕರಾದ ಅಬ್ದುಲ್ ಸಲಾಂ ಸಾಬ್ ಮತ್ತು ಇಸ್ಮಾಯಿಲ್ ಉಪಸ್ಥಿತರಿದ್ದರು.
ಕಾರ್ಮಿಕರ ಕಷ್ಟಗಳಿಗೆ ಸ್ಪಂದಿಸುವುದು ಮತ್ತು ಹಬ್ಬದ ಖಷಿಯನ್ನು ಅವರೊಂದಿಗೆ ಹಂಚಿಕೊಳ್ಳುವುದು ನಮ್ಮೆಲ್ಲರ ಜವಾಬ್ದಾರಿ ಎಂದು ಗಣ್ಯರು ಅಭಿಪ್ರಾಯಪಟ್ಟರು.
ಉಡುಗೊರೆ ವಿತರಣೆ ಮತ್ತು ನಿರೂಪಣೆ:
ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಎಲ್ಲಾ ಕಾರ್ಮಿಕರಿಗೂ ವಿಶೇಷ ಉಡುಗೊರೆಗಳನ್ನು ನೀಡಿ ಗೌರವಿಸಲಾಯಿತು. ರಾಯಲ್ ಎಂಟರ್‌ಪ್ರೈಸಸ್‌ನ ಮಾಲೀಕರು ಮತ್ತು ಸಿಬ್ಬಂದಿ ವರ್ಗದವರು ಹಾಗೂ ಈರೋ ಗಮ್ ಕಂಪನಿಯ ಅಧಿಕಾರಿಗಳು ಕಾರ್ಯಕ್ರಮದ ಯಶಸ್ಸಿಗೆ ಶ್ರಮಿಸಿದರು. ಯುವ ಸಾಹಿತಿ ಹಾಗೂ ಸಾಮಾಜಿಕ ಕಾರ್ಯಕರ್ತರಾದ ಅಬ್ದುಲ್ ಶರೀಪ್ ಕಾರ್ಯಕ್ರಮವನ್ನು ಅತ್ಯಂತ ಅಚ್ಚುಕಟ್ಟಾಗಿ ನಿರೂಪಿಸಿದರು.
